Հայկական մի քանի լրատվամիջոցներ նոր վարկածներ են առաջ քաշել, կապված` փոխոստիկանապետ Գեւորգ Մհերյանի սպանության հետ: Լրատվամիջոցները իրենց աղբյուրները չեն բացահայտել ու այդ վարկածները ներկայացրել են իբրեւ ճշմարտություն:
Հանրապետությունում այս տարվա ամենաաղմկոտ սպանություններից մեկը` Փոխոստիկանապետի սպանությունը դեռեւա մնում է չբացահայտված: Մամուլը մերթ ընդ մերթ հանդես է գալիս բոցավառ հոդվածներով, թե արդեն գործը բացահայտված է, հետո մեկ ուրիշն է նման մի բան գրում: Այսօր մի անգամից ՙԻրավունք՚ եւ ՙՀրապարակ՚ թերթերը հոդվածներ են հրապարակել, թե Գեւորգ Մհերյանի սպանությունը արդեն բացահայտված է: Ամեն մեկը ներկայացրել է մի պատմություն: Հղումը հայկական ժուռնալիստիկայի հերն անիծող այսպես կոչված ՙգաղտնի աղբյուրների՚ վրա է: Ասենք Իրավունք թերթի պատմությունը. Մեջբերում եմ` ՙԸստ մեր ունեցած հավաստի տեղեկությունների` սպանության կասկածանքով ձերբակալվել է ոստիկանական ակադեմիայի հրաձգության դասախոս ոմն փոխգնդապետ` Խորենը՚: Մեջբերման ավարտը: Այնուհետեւ գրում է, որ այս Խորենը Փոխոստիկանապետի հետ ինչ-ինչ գործարքներ է արել, հետո իրար չեն հասկացել ու Խորենը սպանել է Գեւորգ Մհերյանին: Հիմա էլ Այդ Խորենը ձերբակալված է: Հաջորդ վարկածը, որ էլի հղում անելով իրենց սեփական աղբյուրներին ներկայացրել էր ՙՀրապարակ՚ թերթը: Պատմությունը հետեւյալն է` Փոխոստիկանապետն իր աշխատանքային գործունեության ընթացքում ղեկավարել է Գ. Իգիթյան անուն ազգանունով մարդու դատապարտման գործը: Նրա եղբայրը` Վ. Իգիթյանը համարելով, որ իր եղբոր դատապարտման հիմնական մեղավորը Փոխոստիկանապետն է, վրեժ է լուծել: Մեջբերում եմ` ՙՄեր աղբյուրները ասում են, որ սա քննիչ Հեկտոր Սարդարյանի առաջ քաշած վարկածն է, որը շատ հնարավոր է ՙփչվի՚, կամ էլ ջրվի՚: Մեջբերման ավարտը: Պաշտոնական տեսակետը լսելու համար մենք էլ փորձեցինք կապ հաստատել քննչական խմբի ղեկավար Հեկտոր Սարդարյանի հետ: Քննիչը հերքեց մամուլում հրապարակված նյութերի ճշմարտացի լինելը` համարելով դրանք սուտ: Այս պահին, ըստ քննիչի, դեռ ոչ մի բան էլ չի բացահայտվել: Մեջբերում են`ՙՆման տեղեկություններ գոյություն չունեն իրականում: Վարկածներ կան, բայց ոչ մի վարկածի վրա էլ այս պահին կանգ չենք առել: Իսկ եթե նույնիսկ որեւէ վարկած էլ լինի, դրա տարածումը կփչացնի գործի ընթացքը՚: Մեջբերման ավարտը: Ի վերջո Ճշմարտության որոնումները տանում են այնտեղ, որտեղից սկսել էինք մեր պատմությունը: Այս պարագայում կա 4 տարբերակ. առաջինը` ճիշտ է Իրավունքի հոդվածագիրը, կամ ավելի ճիշտ նրա աղբյուրները, երկրորդ տարբերակ, ճիշտ է ՙՀրապարակ՚-ի հայտարարությունը, երորդ` ճիշտ է քննչական խմբի ղեկավարը եւ վերջին` չորրորդ, բոլորն էլ սուտ են եւ ճշմարտությունը շան գլխի տեսքով ուրիշ տեղ է թաղված:
Comments