Չորեքշաբթի կեսգիշերին մոտ ծեծի է ենթարկվել «Շանթ» հեռուստաընկերության մեկնաբան Նվեր Մնացականյանը:
«Աշխատանքը ավարտելուց հետո ես վերադառնում էի տուն, ինչպես ամեն օր», - «Ազատություն» ռադիոկայանին հինգշաբթի օրը պատմեց Մնացականյանը: - «Մեքենան կանգնեցրել եմ գարաժ, որը մեր շենքից մի փոքր ներքեւ է գտնվում, ոտքով քայլել եմ դեպի տուն: Շենքի անկյունը պտտվելիս մուտքի մոտ ես նկատեցի այդ երկու երիտասարդին, որոնց երբեւէ չէի տեսել… Իրենք մուտքի մոտ դեմ-դիմաց կանգնած զրուցում էին: Շշուկով էին զրույցում: Ինչ-որ կասկածանք առաջացավ իմ մոտ: Ինչ-որ կանխազգացումով փորձեցի զանգահարել տղայիս»:
Հենց այդ պահին էլ, նրա խոսքով, անծանոթները հարձակվել էին իր վրա. - «Որեւէ բառ առանց ասելու… Մեկը դեմից, մեկը կողքից սկսեցին խփել: Գլխարկներով, ատլետիկ տղաներին էին, դեմքերը բաց էին… Կարճ տեւեց, որովհետեւ ես սկսեցի բղավել, հարեւաններին օգնության կանչել: Հարեւանները արագ դուրս եկան: Լույսը վառեց հարեւանը: Ինձ թվում է, այդ լույսը իրենց շատ անհանգստացրեց: Արագ փախան»:
Նվեր Մնացականյանը դժվարացավ որեւէ բացատրություն տալ կատարվածին. - «Չեմ կարող ասել: Մեր գործունեության մեջ ամեն ինչի հետ կարելի է կապել: Ես որեւէ բիզնեսի կամ որեւ որեւէ այլ գործունեության հետ կապ չունեմ: Չեմ էլ ունեցել»:
Հարցին, թե հնարավո՞ր է, որ դա կապված լինի իր հեղինակած հեռուստահաղորդումներից մեկի հետ, Մնացականյանը արձագանքեց. - «Ես այդպիսի հետեւություններ անել չեմ կարող: Ես այդպիսի թողարկումներ տարին մի 15-20 հատ անցկացնում եմ…»:
Հեռուստալրագրողը վնասվածքներ է ստացել գլխին, ձեռքին եւ ոտքին: Երեկ «Արմենիա» բժշկական կենտրոնում անհրաժեշտ բուժօգնություն ստանալուց հետո վերադարձել է տուն:
Դեպքի առնչությամբ հարուցվել է քրեական գործ՝ դիտավորությամբ առողջությանը միջին ծանրության վնաս պատճառելու հատկանիշներիով:
www.azatutyun.am
Comments
Երեկ ուշ երեկոյան հարձակման է ենթարկվել լրագրող, ՙՇանթ՚ հեռուստատընկերության հաղորդավար Նվեր Մնացականյանը: Բարեբախտաբար` նրա առողջությանը վտանգ չի սպառնում:
Հայ ազգային կոնգրեսը, խստորեն դատապարտում է այս բռնարարքը: Դա եւս, ինչպես համարյա ամենօրյա դարձած այսօրինակ դեպքերը Հայաստանում ոչ միայն իշխանության չգոյության, այլ հենց իրեն իշխանություն հորջորջող ապօրինի վարչախմբի վարած ներքին քաղաքականության արդյունքն է£ Դա արդյունք է նաեւ այն խրախուսիչ անտարբերության, որ տիրում է մտավորական ու լրագրողական լայն շրջանակներում£ Լրագրողների նկատմամբ այս հարձակումների և չբացահայտումների շղթան վկայում են մեկ բանի մասին: Բոլոր այս հանցանքները ծանրացած են գործող քրեական իշխանության վրա:
ՙԺառանգություն՚ կուսակցությունը խստորեն դատապարտում է ՙՇանթ՚ հեռուստաընկերության հաղորդավար Նվեր Մնացականյանի եւ “Armenia Today” լրատվական գործակալության համակարգող Արգիշտի Կիվիրյանի դեմ իրականացված բռնարարքները: Ազատ խոսքի եւ այլընտրանքային հայացքներ ունեցող քաղաքացիների դեմ ցայսօր անարգել շարունակվող ոտնձգությունները, դրանք պարտակելու ակնհայտ վարքագիծը վկայում են, որ իշխանությունների կողմից լռելյայն խրախուսվում են երկրում արմատավորված անպատժելիության մթնոլորտը եւ իրավական կամայականությունները զանգվածային տեղեկատվության միջոցների ներկայացուցիչների նկատմամբ:
ՙԺառանգությունը՚ իրավապահ մարմիններից պահանջում է անհապաղ բացահայտել եւ օրենքի ողջ խստությամբ պատժել հանցագործներին: Մարդու իրավունքների համակարգված ոտնահարումներն ուղղակի հետեւանք են այն իրողության, որ ՀՀ ոստիկանությունն իր բուն պարտականությունները կատարելու փոխարեն լծվել է իշխանությունների ու նրանց հովանավորյալների սանձարձակությունները կոծկելու եւ լրագրողներին ահաբեկելու անպատվաբեր գործին:
ՙԺառանգություն՚ կուսակցություն
7 մայիսի 2009թ.