Գլենդեյլի մեմորիալ հոսպիտալը այսօր համարվում է 50 ամերիկյան լավագույն հիվանդանոցներից մեկը: Այն մաս է կազմում ԱՄՆ արևմուտքում գործող CHW խոշոր բժշկական միավորման, որի մեջ մտնում են ևս 41 հիվանդանոց:
Ըստ Գլենդեյլի մեմորիալ հոսպիտալի տնօրենների խորհրդի անդամ Պերճ Ջամբազյանի՝ իրենց այցի նպատակն է ծանոթանալ մեր երկրում տիրող առողջապահական իրավիճակի հետ և քննարկել հետագայում բժշկական կենտրոնի հիմնադրման և գործունեության հետ կապված հարցեր:
Պատվիրակության անդամներն արդեն հանդիպել են առողջապահության նախարարությունում, պարզել են` որոնք են մեր երկում ամենատարածված հիվանդությունները: Ինչպես սպասվում է, Երևանում կգործի Գլենդեյլի մեմորիալ հոսպիտալի մասնաճյուղային հիվանդանոցը, Գյումրիում ` մանկական բժշկական կենտրոնը, իսկ մարզերում կբացվեն ախտորոշման արդիական կենտրոններ:
Մոտակա քայլերն այս ուղղությամբ կիրականացվեն արդեն մոտակա երկու ամսվա ընթացքում: Հայկական կողմը անհատույց տարածք է տրամադրել կառուցվելիք երևանյան բժշկական համալիրի համար:
Իր խոսքում Գլենդեյլի քաղաքապետ Արա Նաջարյանը կարևորեց Գլենդեյլի մեմորիալ հոսպիտալի նախանշված մուտքը Հայաստան՝ արձանագրելով, որ Գլենդեյլում և Լոս Անջելեսում ամենալավ բժիշկները հայերն են: Նա չբացառեց, որ ԱՄՆ Կալիֆորնիա նահանգը նաև այլ ոլորտերում ներկայացված կլինի Հայաստանում:
Գլենդեյլի քույր քաղաքում ` Կապանում, ըստ պարոն Նաջարյանի, կնորոգվի քաղաքային հիվանդանոցը:
Լրագրողների խնդրանքով պարոն Նաջարյանը աքնդրադարձավ նաև ԱՄՆ կողմից Հայոց ցեղասպանության ճանաչման հարցին: Գլենդեյլի խիստ քննադատության ենթարկեց ԱՄՆ նախագահ Բարաք Օբամային` Հայոց ցեղասպանության ճանաչման իր տված խոստումը չկատարելու համար: «Օբաման մեզ խաբեց»,- հայտարարեց նա:
Չնայաց դրան՝ Բարաք Օբաման մեծ հնարավորություններ ունի վերընտրվել իր պաշտոնում հաջորդ տարի անցկացվելիք նախագահական ընտրություններում, հայտարարեց Գլենդեյլի քաղաքապետը:
Comments