Մեղրու փոխանակման ծրագիր երբեք չի եղել ու չի կարող լինել

Լեռնային Ղարաբաղի խնդրի կարգավորման  շուրջ բանակցություններում Մեղրին Ադրբեջանին հանձնելու ծրագիր երբեք չի եղել ու չի էլ կարող լինել: Այս մասին այսօր հայտարարել է պաշտպանության նախարար  Սեյրան Օհանյանը «Հայոց արծիվներ» հասարակական կազմակերպության անդամների հետ հանդիպման ժամանակ:

Նախարարի համար այդ զրույցները ևս նորություն չէին:

«Ես էլ, ինչպես դուք՝ Մեղրու փոխանակումների մասին լսում եմ հասարակության շրջանում սովորական խոսակցությունների ընթացքում: Նման ծրագիր երբեք չի եղել ու չի կարող լինել»,- ասաց նա:

Սեյրան Օհանյանը նշեց, որ մեր երկրի զինված ուժերը պայքար է մղելու մեր ունեցած յուրաքանչյուր թիզ հողի համար՝ առաջնորդվելով ագրեսիայի ժամանակ պատերազմի դաժանությունները հակառակորդի դաշտ տեղափոխելու սկզբունքով: Այնուամենայնիվ, թուրքական կողմը տարբեր ձևերով այսօր ևս աջակցում է ադրբեջանցի դաշնակիցներին, մասնավորապես Նախիջևանում, նկատեց Սեյրան Օհանյանը:

Պաշտպանության նախարարը նշեց, որ հայ-ռուսական ռազմական համագործակցությունը ստեղծել է անվտանգային միջավայր՝ սպառնալիքների զսպման և անհրաժեշտության դեպքում նաև հակազդնան առումներով: Նա կարևորեց մեր երկրի ակտիվ մասնակցությունը Հավաքական Անվտանգության Պայմանագրի Կազմակերպությանը:

Ըստ Օհանյանի, ՀԱՊԿ անդամ պետությունները անհրաժեշտության դեպքում պարտավոր  են աջակցել մեր երկրին: Իրականում ինչպես կստացվի, ինչ դերակատարում կունենան մասնավորապես միջինասիական երկրները՝ կերևա ընթացքում, ասաց նախարարը:

Լսել ռեպորտաժը կարելի է այս հղումով