Գործարկվում է Իրան - Հայաստան գազատարը
12.05.2009
Ակնկալվում է, որ երեքշաբթի օրվանից կգործարկվի Իրան - Հայաստան գազատարը, եւ Հայաստանը կսկսի Իրանից գազ ստանալ: Այդ մասին "Ազատություն" ռադիոկայանի հետ զրույցում ասաց Հայաստանի էներգետիկայի նախարարության խոսնակ Lուսինե Հարությունյանը:
Կողմերի միջեւ 2004 թվականին ստորագրված պայմանագրի համաձայն, Հայաստանը իրանական գազի դիմաց կվճարի էլեկտրաէներգիայով. յուրաքանչյուր խորանարդ մետրի դիմաց` 3 կիլովատտ/ժամ էլեկտրաէներգիա: Գործարքի իրականացման մանրամասները քննարկելու նպատակով երեկ Երեւան է ժամանել Իրանի գազ արտահանող ազգային ընկերության կառավարող տնօրեն Սեյեդ Ռեզա Կասաիզադեհի գլխավորած պատվիրակությունը:
"Սկսվում է Իրան - Հայաստան գազատարի պայմանագրի շրջանակում ընդգրկված "գազ` էլեկտրաէներգիայի դիմաց" բանաձեւի գործնական փուլը: Այսինքն, նշանակում է, որ Հայաստանը Իրանից կվերցնի գազ, փոխարենը կմատակարարի էլեկտրաէներգիա: Պատվիրակությունները տեղում կքննարկեն ռեժիմները, աշխատանքները եւ հետագա գործընթացները", - ասաց էներգետիկայի նախարարության խոսնակը:
Մինչ Երեւան ժամանելը, իրանական պատվիրակության ղեկավարը հիշեցրել է, որ կողմերը ի սկզբանե պայմանավորվել էին փոխանակումը սկսել դեռեւս 2007 թվականի հունվարին: "Սակայն հայերը հետագայում ասացին, թե պատրաստ չեն", - ասել է Կասաիզադեհը` հավելելով. - "Այժմ Հայաստանն ասում է, թե պատրաստ է Իրանից գազ ստանալ, եւ մեր այցելության հիմնական նպատակներից մեկը այդ ծրագրի մեկնարկն է":
Հայաստանի էներգետիկայի նախարարության խոսնակի փոխանցմամբ` երկու երկրների պատվիրակությունների բանակցություններին զուգընթաց, այսօրվանից, "ամենայն հավանականությամբ, կսկսվի գազի աստիճանական մատակարարումը":
Շուրջ 140 կիլոմետրանոց գազատարի շինարարությունը հայկական կողմը պաշտոնապես ավարտեց 2008 թվականի դեկտեմբերին: Մինչ այժմ, սակայն, պաշտոնական երեւանը հայտարարում էր, թե իրանական գազի կարիքը չի զգում, թեեւ տեխնիկապես պատրաստ է ցանկացած պահի այն ընդունել:
Այժմ, ըստ իրանական կողմի, մատակարարումը սկսվելու է օրական շուրջ 2 միլիոն խորանարդ մետրից: "Առաջիկա երկու տարիներին ընթացքում այդ թողունակությունը կարող է կրկնապատկվել, իսկ 2011-ից հետո` անցնել օրական 6 միլիոն խորանարդ մետր սահմանը", - ասել է Իրանի գազ արտահանող ազգային ընկերության պաշտոնական ներկայացուցիչը:
Ազատություն ռ/կ
Comments